Sizi “ADEX 2026” 6-cı Azərbaycan Beynəlxalq Müdafiə Sərgisinin və “Securex Caspian 2026” 15-ci Yubiley Beynəlxalq Daxili Təhlükəsizlik, Mühafizə və Xilasetmə Avadanlıqları Sərgisinin açılışı münasibətilə təbrik edir və Azərbaycanda səmimi-qəlbdən salamlayıram. 

Bakı şəhərində ənənəvi olaraq təşkil edilən “ADEX” sərgisinin regionun ən mötəbər və faydalı müdafiə sənayesi platformalarından birinə çevrilməsini görmək məmnunluq doğurur. Bu sərgiyə marağın ildən-ilə artması, burada bir çox ölkənin və aparıcı şirkətin təmsil olunması tədbirin aktuallığını və beynəlxalq nüfuzunu əyani şəkildə əks etdirir. 

Dost və tərəfdaş ölkələrin müdafiə sənayesi qurumlarını, hərbi ekspertlərini və şirkətlərini bir araya gətirən bu mühüm beynəlxalq sərgi müdafiə sənayesinin müxtəlif istiqamətləri üzrə ən son texnologiyaların, müasir silah sistemlərinin, hərbi texnika nümunələrinin, həmçinin innovativ həllərin nümayiş etdirilməsinə, yeni əməkdaşlıq imkanlarının müzakirə olunmasına və qarşılıqlı faydalı tərəfdaşlıq əlaqələrinin qurulmasına əlverişli imkan yaradır. 

Müdafiə qabiliyyətinin möhkəmləndirilməsi və milli təhlükəsizliyin təmin edilməsi Azərbaycanın dövlət siyasətinin prioritet istiqamətlərindən biridir. Həyata keçirilən ardıcıl tədbirlər nəticəsində böyük inkişaf yolu keçən ölkəmizin müdafiə sənayesi bu gün keyfiyyətcə yeni mərhələyə qədəm qoymuş və istehsal imkanlarını əhəmiyyətli dərəcədə genişləndirmişdir. Yerli müəssisələrdə istehsal olunan müdafiə təyinatlı məhsullar Silahlı Qüvvələrimizin təchizatında mühüm yer tutmaqla yanaşı, beynəlxalq bazarlarda da rəqabət qabiliyyəti ilə seçilərək müxtəlif ölkələrin aidiyyəti qurumları tərəfindən xüsusi maraqla qarşılanır. Azərbaycanın müdafiə sənayesi sahəsində əldə etdiyi nailiyyətlər ölkəmizin hərbi-texniki potensialının güclənməsinə, dost və tərəfdaş dövlətlərlə əməkdaşlığın dərinləşməsinə xidmət edir.  

Bu gün Azərbaycanın müdafiə sənayesi məhsullarının keyfiyyəti və etibarlılığı beynəlxalq səviyyədə yüksək qiymətləndirilir. “ADEX” sərgisi həm ölkəmizin müdafiə-sənaye kompleksinin gücünün və potensialının, o cümlədən innovativ texnologiyalarının, həm də tərəfdaşlarımızın müdafiə sənayesi müəssisələrinin müasir məhsullarının və yeni nailiyyətlərinin beynəlxalq ictimaiyyətə təqdim olunması baxımından xüsusi əhəmiyyət daşıyır. 

“ADEX” ilə paralel olaraq və bu il artıq 15-ci dəfə keçirilən “Securex Caspian” sərgisi də öz növbəsində təhlükəsizlik, mühafizə, xilasetmə və fövqəladə halların idarə olunması sahələrində qabaqcıl texnologiyaların nümayiş etdirildiyi ixtisaslaşmış tədbirlərdən biri olaraq böyük nüfuz qazanmışdır. 

Əminəm ki, “ADEX” və “Securex Caspian” sərgiləri iştirakçılar arasında yeni işgüzar əlaqələrin qurulmasına, habelə hərbi-texniki tərəfdaşlığın gücləndirilməsinə mühüm töhfə verəcəkdir. 

Hər birinizi bir daha ürəkdən salamlayır, sərgilərin işinə uğurlar, iştirakçılara səmərəli fəaliyyət arzulayıram! 

Ümummilli Lider Heydər Əliyevin layiqli davamçısı möhtərəm Prezident cənab İlham Əliyevin rəhbərliyi ilə həyata keçirilən genişmiqyaslı islahatlar nəticəsində ölkəmizin iqtisadiyyatı sürətlə inkişaf etmiş, böyük uğurlar əldə olunmuşdur. Azərbaycanın iqtisadi inkişafı və müstəqil siyasəti onu yalnız regional deyil, həm də dünya miqyasında önəmli bir dövlətə çevirmişdir. Bu inkişaf, həmçinin ölkəmizin təhlükəsizlik və müdafiə sahəsindəki mövqeyinin möhkəmlənməsinə və Azərbaycanın beynəlxalq təhlükəsizlik məsələlərindəki rolunun artmasına zəmin yaratmışdır. “Securex Caspian 2026” 15-ci Yubiley Beynəlxalq Daxili Təhlükəsizlik, Mühafizə və Xilasetmə Avadanlıqları Sərgisi də ölkəmizin bu istiqamətdə artan mövqeyini və uğurlu inkişaf strategiyasını əks etdirir. Azərbaycanın təhlükəsizlik sahəsində əldə etdiyi nailiyyətlər yalnız ölkə daxilində deyil, həm də beynəlxalq arenada ona yeni dostlar, müttəfiqlər və strateji tərəfdaşlar qazandırmışdır.

Bu gün dünyadakı dinamik dəyişikliklər və qlobal təhlükəsizlik çağırışları fonunda dövlətlər arasında müasir texnologiyaların və təhlükəsizlik vasitələrinin mübadiləsi və inkişafı daha da aktuallaşır. Terrorçuluq, münaqişələr, mütəşəkkil cinayətkarlıq, kütləvi qırğın silahlarının yayılması kimi qlobal təhlükələr dövlətlərin təhlükəsizlik məsələlərinə daha ciddi yanaşmalarını tələb edir. “Securex Caspian” sərgisi dünyada qabaqcıl təhlükəsizlik və mühafizə texnologiyalarının, yeni avadanlıqların və innovasiyaların təqdim edilməsi baxımından mühüm platformadır. Bu sərgi təhlükəsizlik və müdafiə sahəsində qlobal əməkdaşlığın inkişafı və yeni təcrübələrin mübadiləsi üçün mükəmməl vasitədir.

Azərbaycan “Securex Caspian” sərgisi vasitəsilə yalnız regionda deyil, həmçinin dünya miqyasında təhlükəsizlik və müdafiə sahəsində mühüm strateji tərəfdaşa çevrilməkdədir. Müxtəlif ölkələrdən gələn təhlükəsizlik və mühafizə sahəsində fəaliyyət göstərən şirkətlər və mütəxəssislər bu sərgidə bir araya gələrək işgüzar əlaqələr qurmaq, yeni əməkdaşlıq sahələri yaratmaq və qarşılıqlı faydalı anlaşmalar əldə etmək imkanı qazanırlar. Bu, həm də Azərbaycanın güclü müdafiə sənayesini beynəlxalq bazarda tanıtmaq və daha çox ölkə ilə əməkdaşlıq imkanlarını artırmaq məqsədini daşıyır.

“Securex Caspian 2026” 15-ci Yubiley Beynəlxalq Daxili Təhlükəsizlik, Mühafizə və Xilasetmə Avadanlıqları Sərgisi müasir texnologiyaların və təhlükəsizlik avadanlıqlarının təqdimatı ilə yanaşı, iştirakçılar, ekspertlər və ziyarətçilər üçün bilik və təcrübə mübadiləsinin həyata keçirilməsi, eləcə də yeni işgüzar əlaqələrin qurulması baxımından geniş imkanlar yaradır. Əminəm ki, sərginin nəticələri Azərbaycanın təhlükəsizlik və müdafiə sahəsindəki beynəlxalq mövqeyini daha da möhkəmləndirəcək və iqtisadi inkişafımıza yeni impulslar verəcəkdir.

Bu sərgi yeni əməkdaşlıq əlaqələrinin və faydalı iqtisadi təmasların qurulmasına zəmin yaradaraq, ölkəmizin müasir dünyada yerini daha da gücləndirmək və yeni tərəfdaşlarla gələcəkdə daha möhkəm əlaqələr qurmaq üçün əvəzsiz fürsətdir.

Bir daha sərgi iştirakçılarını səmimiyyətlə salamlayır və uğurlar arzulayıram!

Hörmətlə,

Vüqar Mustafayev

Azərbaycan Respublikasının
müdafiə sənayesi naziri

“Securex Caspian 2026” 15-ci Yubiley Beynəlxalq Daxili Təhlükəsizlik, Mühafizə və Xilasetmə Avadanlıqları Sərgisinin Azərbaycan Respublikası Müdafiə Sənayesi Nazirliyinin rəhbərliyi altında “ADEX 2026” Azərbaycan Beynəlxalq Müdafiə sərgisi ilə birgə keçirilməsi mühüm hadisədir. Bu münasibətlə sərgilərin iştirakçılarını və qonaqlarını ürəkdən salamlayır və təbrik edirəm.  

Ulu Öndər Heydər Əliyevin möhkəm təməlini qoyduğu qüdrətli dövlətçilik və dayanıqlı iqtisadi inkişaf ölkəmizin güc, hüquq mühafizə, təhlükəsizlik strukturlarının da davamlı inkişafını, yüksəlişini və müasirləşməsini təmin etmiş, habelə Azərbaycan Respublikasının Prezidenti cənab İlham Əliyevin 2005-ci il dekabrın 16-da imzaladığı sərəncamla yaradılmış Müdafiə Sənayesi Nazirliyi              bu qurumların müasir texnika və avadanlıqla təchizatında daha geniş imkanlar yaratmışdır.  

Artıq ənənəvi xarakter almış “ADEX” sərgisi beynəlxalq hərbi-texniki əməkdaşlığın inkişafında əhəmiyyətli rol oynayan, müasir silah və texnologiyaların istehsalçısı olan hərbi sənaye müəssisələrini, xarici şirkətləri, təşkilatları                        və mütəxəssisləri işgüzar əlaqələr qurmaq və yeni müqavilələr imzalamaq üçün                bir araya gətirən ideal bir platformaya çevrilmiş, Dövlət Başçısının “ADEX” sərgisinə dəstəyi isə onun beynəlxalq nüfuzunu yüksəltmiş, eyni zamanda sərgiyə marağın, iştirakçı dövlətlərin və şirkətlərin sayının ilbəil artmasını şərtləndirmişdir.  

Bu sərgilər özünün müdafiə sənayesini inamla inkişaf etdirən ölkəmiz üçün həm də əldə olunmuş uğurların dünyada tanıdılması və təşviqi, elmi və texnoloji potensialın gücləndirilməsi baxımından mühüm əhəmiyyət kəsb edir, eləcə də faydalı təcrübə mübadiləsinin aparılmasına şərait yaradır.  

Respublikamızda asayişin qorunmasında, cinayətkarlıqla, o cümlədən             onun transmilli mütəşəkkil növləri ilə mübarizədə yeni texnologiyaların tətbiqinə bu gün də böyük önəm verilir və sözsüz ki, davamlı surətdə möhkəmlənən işgüzar əlaqələrimiz daxili və beynəlxalq təhlükəsizliyə dəyərli töhfə olacaqdır. 

Sərgilərin açılışı münasibətilə tədbirin təşkilatçılarını və bütün iştirakçılarını bir daha təbrik edir, yeni-yeni nailiyyətlər arzulayıram! 

Dərin hörmətlə,  

Vilayət Eyvazov 

Azərbaycan Respublikasının daxili işlər naziri 
general-polkovnik 

Sizi “Securex Caspian 2026” 15-ci Yubiley Beynəlxalq Daxili Təhlükəsizlik, Mühafizə və Xilasetmə Avadanlıqları Sərgisində səmimi-qəlbdən salamlayıram.

Azərbaycan Respublikasının Prezidenti cənab İlham Əliyevin müdrik rəhbərliyi ilə həyata keçirilən uğurlu siyasət sayəsində müasir Azərbaycan bu gün özünün ən qüdrətli dövrünü yaşayır. Son illər ölkəmizin bir sıra mühüm beynəlxalq tədbirlərə, o cümlədən xüsusi təyinatlı texnikaların nümayiş etdirilməsinə həsr olunan sərgilərə ev sahibliyi etməsi respublikamızın bütün istiqamətlərdə davamlı inkişafı, ölkənin beynəlxalq aləmdə nüfuzunun günbəgün daha da artması, siyasi və iqtisadi mövqeyinin güclənməsinin bariz göstəricisidir.

Şübhəsiz ki, ölkələrin əldə etdikləri nailiyyətlər, sabitlik və firavanlıq təhlükəsizliyin etibarlı təmin olunması ilə üzvi surətdə bağlıdır. Məlumdur ki, müasir dövrümüzdə dövlətlərin milli təhlükəsizliyinə, həmçinin beynəlxalq təhlükəsizlik mühitinə yönəlmiş çoxsaylı təhdidlər özünü göstərməkdədir. Bu təhdidlər terrorçuluq, transmilli mütəşəkkil cinayətkarlıq, narkotik vasitələrin qanunsuz dövriyyəsi, insanların hüquq və azadlıqlarının pozulması, davam edən silahlı münaqişələr və sair bəşəri faciələr formasında təzahür etməkdədir. Qeyd olunan mənfi hallarla effektiv mübarizə isə yalnız dünya ölkələrinin sülh, qarşılıqlı anlaşma və konstruktiv dialoq əsasında səylərinin birləşdirilməsi nəticəsində mümkündür.

Texnoloji yeniliklərin və texniki imkanların sürətli şəkildə artdığı bir dövrdə dövlətlərin təhlükəsizliyinin qorunması, mümkün fövqəladə halların qarşısının alınması, hüquq-mühafizə və xüsusi xidmət orqanlarının birgə fəaliyyətlərində xüsusi avadanlıq və texniki vasitələrin önəmli rolu vardır. Xüsusi texnikanın nümayiş olunduğu “Securex Caspian 2026” beynəlxalq sərgisi tədbir iştirakçılarının, müvafiq təşkilat və qurumların bu kimi avadanlıqlarla yaxından tanış olmaları üçün əlverişli məkandır.

Ümidvaram ki, ənənəvi olaraq keçirilən və Azərbaycanın ictimai həyatında artıq mühüm hadisəyə çevrilmiş beynəlxalq sərgidə nümayiş etdirilən xüsusi məhsullar bu dəfə də iştirakçılar tərəfindən böyük maraqla qarşılanacaq, hüquq-mühafizə və xüsusi xidmət orqanlarının gələcək fəaliyyətlərində geniş şəkildə istifadə olunacaqdır.

“Securex Caspian 2026” 15-ci Yubiley Beynəlxalq Daxili Təhlükəsizlik, Mühafizə və Xilasetmə Avadanlıqları Sərgisinin iştirakçılarını beynəlxalq tədbirin keçirilməsi münasibətilə bir daha ürəkdən təbrik edir, hamınıza müvəffəqiyyətlər arzulayıram.

Əli Nağıyev
Azərbaycan Respublikası
Dövlət Təhlükəsizliyi Xidmətinin rəisi
general-polkovnik

Sizi “Securex Caspian-2026” 15-ci Yubiley Beynəlxalq Daxili Təhlükəsizlik, Mühafizə və Xilasetmə Avadanlıqları Sərgisinin açılışı münasibətilə salamlayır, sərginin işinə uğurlar arzulayıram. 

Müstəqil Azərbaycan dövlətinin banisi, bütün dövrlərin ən böyük azərbaycanlısı Ulu Öndər Heydər Əliyevin layiqli davamçısı möhtərəm Prezidentimiz cənab İlham Əliyevin müdrik rəhbərliyi ilə qısa müddətdə əsrə bərabər inkişaf yolu keçən ölkəmizin beynəlxalq münasibətlər sistemində nüfuzu durmadan artmaqdadır. Cənab Prezidentin “Azərbaycan heç vaxt indiki qədər güclü olmayıb. Biz öz taleyimizin sahibiyik, biz müstəqil ölkəyik, biz azad xalqıq, biz dünya miqyasında öz layiqli yerimizi tutmuşuq və bundan sonra da müstəqillik, inkişaf yolu ilə gedəcəyik” sözləri bugünkü reallıqların olduğu kimi əks etdirən müdrik kəlamlardır. 

Müzəffər Ali Baş Komandan cənab İlham Əliyevin mahir sərkərdəlik bacarığı, qətiyyəti və uzaqgörən siyasəti sayəsində ərazi bütövlüyü və suverenliyini tam bərpa etmiş ölkəmizdə təhlükəsizliyin qorunması, müdafiə sənayesinin durmadan inkişaf etdirilməsi, zamanın çağırış və təhdidlərinə hazırlıq səviyyəsinin daim yüksəldilməsi dövlət başçısının müəyyən etdiyi prioritetlər sırasındadır. 

Bu çərçivədə əhalinin və ərazilərin təbii və texnogen fövqəladə hallardan etibarlı mühafizəsi və mülki müdafiə məsələlərini hər zaman diqqətdə saxlayan cənab Prezidentin müvafiq Sərəncamı ilə yaradılmış, təhlükəsizlik sisteminin mühüm tərkib hissəsi olan Fövqəladə Hallar Nazirliyi dövlət başçısının qayğısı sayəsində istər ölkə daxilində, istərsə də digər ölkələrdə baş verə bilən istənilən fövqəladə hadisə ilə uğurla mübarizə aparmaq imkanına malik çevik və peşəkar dövlət orqanı kimi üzərinə düşən vəzifələri şərəflə yerinə yetirir. 

Ölkəmizin müdafiə qabiliyyətinin və təhlükəsizliyinin təmin edilməsində əhəmiyyətli vəzifə daşıyan Azərbaycan Respublikasının Müdafiə Sənayesi Nazirliyinin istehsal etdiyi son nəsil silah, sursat və hərbi-texniki vasitələr, avadanlıqlar Qalib Ordunun müasir səviyyədə təchizatında mühüm rol oynayır. Bununla yanaşı, qürurvericidir ki, yerli istehsalın ən yeni nailiyyətləri xarici bazarlara çıxarılır, müxtəlif ölkələrdə keçirilən beynəlxalq sərgilərdə uğurla nümayiş olunur. 

Sevindirici haldır ki, Şərqlə Qərbin qovşağında yerləşən müstəqil Azərbaycan qlobal məkanda dövlətlər, xalqlar arasında dostluq, əməkdaşlıq körpüsü kimi tanınır. Ölkəmiz uğurlu milli inkişaf strategiyasının tətbiqi ilə təkcə siyasi, iqtisadi, humanitar, mədəniyyət, idman sahələrində deyil, eyni zamanda təhlükəsizlik sahəsində də beynəlxalq əhəmiyyətli tədbirlərin keçirildiyi mühüm mərkəzlərdən birinə çevrilib. Müdafiə Sənayesi Nazirliyinin təşkilatçılığı ilə ənənəvi olaraq keçirilən və dünyanın aparıcı mühafizə, təhlükəsizlik və xilasetmə vasitələri istehsalçılarının, şirkətlərinin, biznes dairələri və sənaye strukturlarının iştirak etdiyi sərgiyə olan maraq ölkəmizin daim artan qlobal nüfuzundan, yüksək beynəlxalq çəkisindən xəbər verir. 

Bir daha “Securex Caspian-2026” sərgisinin işinə uğurlar arzulayır və əmin olduğumu bildirmək istəyirəm ki, sərgi iştirakçıları, istehsalçılar və ziyarətçilər arasında yeni faydalı əməkdaşlıq münasibətlərinin yaradılmasına, ümumi elmi-texnoloji səviyyənin yüksəldilməsinə mühüm töhfə verəcək və qarşıya qoyulmuş məqsədlərə nail olacaqdır. 

Hörmətlə, 

Kəmaləddin Heydərov 

general-polkovnik  

Azərbaycan Respublikasının 
fövqəladə hallar naziri 
 

Sizi Azərbaycan Respublikasının Müdafiə Sənayesi Nazirliyinin təşkilatçılığı ilə keçirilən “Daxili təhlükəsizlik, mühafizə və xilasetmə avadanlıqları” üzrə 15-ci Yubiley Beynəlxalq “Securex Caspian 2026” sərgisində salamlayıram. 

Təşkil edildiyi 15 il ərzində bu sərgi regionda və onun hüdudlarından kənarda hərbi-sənaye əməkdaşlığı sahəsində əsas platformalardan biri kimi özünü təsdiq etmiş, Azərbaycanın potensialının və beynəlxalq arenada artan rolunun nümayişində mühüm rol oynamışdır. 

Müasir dünyada dövlətlərin təhlükəsizlik sahəsində üzləşdiyi təhdid və çağırışlar müdafiə imkanlarının gücləndirilməsini, milli hərbi sənaye potensialının artırılmasını zəruri edir. 

Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin rəhbərliyi altında milli təhlükəsizlik strategiyasının uğurla və ardıcıl şəkildə həyata keçirilməsi nəticəsində hərbi sənayenin inkişafı dövlətimizin müdafiə qüdrətinin möhkəmləndirilməsində və 44 günlük Vətən müharibəsində tarixi qələbənin əldə olunmasında Silahlı Qüvvələrimizə səmərəli dəstəyin təmin edilməsində həlledici amillərdən olmuşdur. 

Azərbaycanın hərbi sənayesinin inkişafı ölkəmizin ərazi bütövlüyünün, milli təhlükəsizliyinin ən vacib amillərindən olan dövlət sərhədlərinin effektiv, yüksək texnoloji və dayanıqlı mühafizəsinin təmin edilməsinə mühüm töhfə verməkdədir. 

Əminəm ki, bu tədbirin keçirilməsi gələcəkdə də ölkəmizin beynəlxalq nüfuzunun artmasına, Silahlı Qüvvələrin müasir və qabaqcıl silah sistemləri ilə təchiz olunmasına, hərbi-texniki innovasiyalar sahəsində sıx və qarşılıqlı faydalı əməkdaşlığın inkişafına, eləcə də regionun təhlükəsizliyi və sabitliyinin təmin olunmasında Azərbaycanın aparıcı qüvvə kimi rolunun möhkəmləndirilməsinə xidmət edəcəkdir. 

Elçin Quliyev 
General-polkovnik  

Azərbaycan Respublikası Dövlət Sərhəd Xidmətinin rəisi 

Fəaliyyət göstərdiyi illər ərzində “ADEX” Azərbaycanın aparıcı milli sərgi brendlərindən birinə çevrilərək müdafiə sənayesi və təhlükəsizlik sahəsində beynəlxalq əməkdaşlıq üçün mühüm platforma formalaşdırmışdır. Sərginin inkişafında Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı cənab İlham Əliyevin daimi diqqət və dəstəyi mühüm rol oynayır. 

“ADEX 2026” keçirdiyi illər ərzində rekord göstəriciləri ilə yadda qalacaqdır. Bu il sərgidə dünyanın 30-dan çox ölkəsindən 270-dən artıq şirkət və təşkilat iştirak edir. Eyni zamanda, 36 ölkədən 51 rəsmi nümayəndə heyətinin iştirakı “ADEX”ə və Azərbaycana göstərilən yüksək beynəlxalq marağın və etimadın mühüm göstəricisidir. 

İştirakçıların artan marağı ilə əlaqədar olaraq, “ADEX 2026” çərçivəsində məhz ADEX 2026 sərgisi üçün Bakı Ekspo Mərkəzinin 5-ci pavilyonu istifadəyə verildi. Bu, sərgi ekspozisiyasının əhəmiyyətli dərəcədə genişləndirilməsinə imkan yaradıb. «ADEX 2026»-nın əsas yeniliklərindən biri Bakı Ekspo Mərkəzinin 4-cü pavilyonunun ilk dəfə milli ekspozisiyaya ayrılmasıdır. Milli pavilyonda Azərbaycanın müdafiə-sənaye kompleksinin, texnoloji potensialının və istehsal imkanlarının geniş təqdimatı həyata keçirilir. Burada müdafiə sənayesi, texnologiya, kosmik sənaye və mühəndislik sahələrini təmsil edən dövlət qurumları və şirkətlər ən son məhsul və həllərini nümayiş etdirirlər. 

Bizim üçün “ADEX”in uğurunu müəyyən edən əsas göstəricilərdən biri məhz etimaddır. Bu, Azərbaycan dövlətinin layihəyə, tərəfdaşlarımızın isə Azərbaycana və “ADEX”ə göstərdiyi etimaddır. İllər ərzində formalaşmış bu etimada və uzunmüddətli tərəfdaşlığa görə bütün tərəfdaşlarımıza təşəkkürümüzü bildiririk. 

“ADEX”i yalnız sərgi kimi deyil, Azərbaycanın müdafiə sənayesinin gələcəyinə açılan bir pəncərə kimi görürük. Bu pəncərədən yeni texnologiyaları, innovativ həlləri, güclənən milli müdafiə sənayesini və genişlənən beynəlxalq əməkdaşlıq imkanlarını görmək mümkündür. 

İnanırıq ki, “ADEX 2026” yeni işgüzar əlaqələrin qurulmasına, mövcud tərəfdaşlıqların inkişafına və müdafiə sənayesi sahəsində qarşılıqlı faydalı əməkdaşlığın daha da genişlənməsinə töhfə verəcəkdir. 

Biz illər boyu ölkəmiz üçün bu əhəmiyyətli tədbirin təşkilində iştirak etməkdən qürur duyuruq və Azərbaycanın Müdafiə Sənayesi Nazirliyinin təşəbbüsü və təşkilatçılığı ilə, Azərbaycan Respublikasının Müdafiə Nazirliyinin dəstəyi ilə keçirilən bu sərgi üçün bizə göstərilən etimad və dəstəyə görə minnətdarlığımızı bildiririk.  

Bütün iştirakçılara, rəsmi nümayəndə heyətlərinə və qonaqlara uğurlu görüşlər, səmərəli danışıqlar və yeni əməkdaşlıqlar arzulayıram. 

Fərid Məmmədov 
“Caspian Event Organisers” şirkətinin baş direktoru